മാറ്റങ്ങൾ
=========

അങ്ങനെ ഒരോണം കൂടി വന്നെത്തി.

മഹാബലി തമ്പുരാൻ പതിവുപോലെ എത്തിക്കഴിഞ്ഞു. ഇപ്രാവശ്യം ആദ്യം തൃശ്ശൂർ പോകാം എന്ന് തീരുമാനിച്ചു.    റൌണ്ടിലൂടെ കുടയും പിടിച്ച് നടക്കുമ്പോൾ...

അതാ വരുന്നു ഒരു കൊച്ചു ചെറുപ്പക്കാരൻ. കയ്യിലെന്തോ പിടിച്ചു കഴുത്ത് വളച്ച് നോക്കുകയും, ഇടയ്ക്കു മറ്റേ കയ്യ് കൊണ്ട് ആ പിടിച്ചിരിക്കുന്ന സാധനത്തിൽ തോണ്ടുകയും കുത്തുകയും ചെയ്യുന്നു.

"മോനേ, അയ്യന്തോളിലേക്ക് ഉള്ള വഴി പറഞ്ഞു തരാമോ? കഴിഞ്ഞ പ്രാവശ്യം വന്നപ്പോൾ കണ്ടതിൽ നിന്നും തൃശ്ശൂർ വല്ലാതെ  മാറിയിരിക്കുന്നു"

"വല്യപ്പാ.. ഒരു മിനിറ്റ് ട്ടാ. ഈ മെസ്സേജ് വിട്ടിട്ടു പറയാം.. ട്ടാ"

"ങ്ങേ... ഇവന് ഞാൻ ആരാണെന്ന് മനസ്സിലായില്ലേ?" എന്ന് തമ്പുരാൻ ആത്മഗതം പറഞ്ഞു.

മെസ്സേജ് വിട്ടിട്ടും അത് പോയി... ഇല്ല... എന്ന അവസ്ഥയിൽ നിന്ന്, പോയി എന്ന് ഉറപ്പുവരുന്നത് വരെ തല ഉയർത്താതെ പയ്യൻ ചോദിച്ചു

"എങ്ങടാ പോണ്ടേ?"

അത് പറഞ്ഞു കഴിഞ്ഞപ്പോഴേ തല മുഴുവൻ പൊങ്ങിയുള്ളൂ. അപ്പോഴേ തമ്പുരാനെ കണ്ടുള്ളൂ.

"ഇത് കലക്കീ ട്ടാ. അടിപൊളി കൊട. മേത്ത് ള്ള ആ സില്ക്ക് തുണീം കലക്കീ ട്ടാ. ഏത് നാടകം കഴിഞ്ഞിട്ട് വര്വാ? അയ്‌... തിരുവോണം ആയിട്ടില്ല്യല്ലോ. ഇപ്രാവശ്യം നാടകങ്ങള് നേരത്തെ തുടങ്ങ്യാ?"

"മോനേ, നിനക്കെന്നെ മനസ്സിലായില്ല്യേ. ഞാനാണ് മഹാബലി. പണ്ട് ഇവിടെ ഞാനാ ഭരിച്ചിരുന്നത്"

ഒരു സംശയത്തോടെ..  "പണ്ട് ന്ന് പറഞ്ഞാ...പതിനഞ്ച് കൊല്ലം വര്വോ ?"

"അല്ല മോനെ, അതിനുമൊക്കെ മുമ്പ്"

"എനിക്കറിയില്ല്യാട്ടാ...അപ്പൊ ഏതു പാർട്യാർന്നു.  ബി ജെ പ്യാണാ, അതാ കോണ്‍ഗ്രസ്സാ കമ്മ്യൂണിസ്റ്റാ?"

"എന്റെ വാമനാ.. ഞാനിനി എന്തൊക്കെ കേൾക്കണം" തമ്പുരാൻ വീണ്ടും ആത്മഗതം പറഞ്ഞു.

"മോനേ, അതിനുമൊക്കെ മുമ്പ്..."

"ഗാന്ധിജീടേം നെഹ്രൂന്റെം കാലത്താ?"

"അല്ല... മോനേ"

"അപ്പൊ.. ബാബറിന്റെ കാലത്താ? അതാ അശോകന്റ്യാ?"

"അതുക്കും മുന്നേ..."

"വല്യപ്പാ, ന്തൂട്ടാ ഈ പറേണേ.. വെറുതെ ആളെ ഫൂൾ ആക്കരുത് ട്ടാ. അപ്പൊ നേരെ സെമിത്തേരീന്നു വര്വാണാ?"

"ഇവന് ഒട്ടും ബഹുമാനം ഇല്ലല്ലോ... വളർത്തുദോഷം.."

"മോനെ, ഞാൻ മഹാബലി, എന്നെ വാമനൻ പാതാളത്തിലേക്ക്‌ ചവിട്ടി താഴ്ത്തി. അറിയില്ലേ  ആ കഥ?"

"ആ... ഇപ്പൊ ഓർമ്മ വന്നൂട്ടാ. ആ മൊട്ടത്തലയൻ കാരണം... നിങ്ങൾക്ക് വല്ല വട്ടും ണ്ടാർന്നാ.. വെറുതെ തല വച്ച് കൊടുക്കാൻ? ഇവ്ടെ ഓരോരുത്തന്മാര് ഭരിക്കാൻ കസേരേൽ കേറ്യാ പിന്നെ ഇറങ്ങണ പണീല്ല്യ".

"മോനേ അത് ആ യുഗം... ധർമ്മത്തിന്റെ കാലം.. ധർമ്മക്ഷേത്രേ കുരുക്ഷേത്രേ സംഭവാമി യുഗേ യുഗേ.. എന്നല്ലേ?"

"ഞങ്ങള് അതൊക്കെ മാറ്റി... ദീപസ്തംഭം മഹാശ്ചര്യം..എനിക്കും കിട്ടണം പണം. എന്നണിപ്പോ"

"മോന്റെ വീട് എവിടെയാണ്?"

"കോലഴി"

"എന്നിട്ടെന്താ മോന് എന്നെ കണ്ടപ്പോൾ മനസ്സിലാകാതിരുന്നത്?"

"മേം ബംഗാൾ സെ പന്ത്രഹ് സാൽ പഹലേ കേരളാ മേം ആ ഗയാ?"

"ഇതേത് ഭാഷയാ?"

"ഹിന്ദി.. ഞാൻ പതിനഞ്ച് കൊല്ലം മുമ്പ് വന്നതാ വ് ടെ. ങ്ങടെ കഥയൊന്നും എനിക്ക് ശരിക്കും അറിയില്ല്യാട്ടാ. സോറി ഗഡി ".

"പക്ഷെ തൃശ്ശൂർ ഭാഷ നന്നായി പറയുന്നണ്ടല്ലോ. "

"അങ്ങാടീലാ പണി ... നിങ്ങള് വല്ലപ്പോഴൂല്ലേ വരണ്. ഒരു രണ്ടു മാസം മതീട്ടാ ഭാഷ മാറാൻ... "

അങ്ങനെ ബംഗാളി മലയാളി പറഞ്ഞു കൊടുത്ത വഴിയിലൂടെ മഹാബലി തമ്പുരാൻ അയ്യന്തോളിലേക്ക് നടന്നു തുടങ്ങി.

കുറച്ചു നടന്നപ്പോൾ വലിയൊരു ജനക്കൂട്ടം. പ്രജകളെ കുറെ പേരെ ഒരുമിച്ചു കാണാം എന്ന സന്തോഷത്തിൽ തമ്പുരാൻ അവിടേക്ക് നടന്നു.

അടുത്ത് ചെന്നപ്പോഴാണ് അതൊരു വരി ആണെന്ന് മനസ്സിലായത്‌. ഒരാൾ അതിലേക്കു ഇടിച്ചു കയറാൻ ശ്രമിക്കുന്നു. വരിയിലുള്ളവർ ബഹളം വക്കുന്നു

"ഡാ കുട്ടപ്പാ, ്#$%^&&* വരിയിൽ കയറ്യാൽ നിന്റെ കൂമ്പ്‌  എടുക്കും"

10 മിനിറ്റ് നേരത്തെ അധ്വാനം കൊണ്ട് കുട്ടപ്പൻ വരിയിൽ കയറി. എല്ലാവരും കുട്ടപ്പനെ തെറി വിളിച്ചു. മുമ്പുള്ള പല സന്ദർശനങ്ങളിലും ആ വാക്കുകൾ കേട്ടിട്ടുള്ള കാരണം തമ്പുരാൻ കുട്ടപ്പന്റെ അടുത്ത് ചെന്നു.

"എന്താ കുട്ടപ്പാ പ്രശ്നം. എന്തിനാണ് ഈ വരിയിൽ കയറിയത്. ഇങ്ങനെ ചെയ്യുന്നത് ശരിയാണോ?"

"ഒന്ന് പോയേരാവിടന്നു. ഇപ്രാവശ്യം നേരത്തെ തന്നെ ഇറങ്ങ്യാ? നാടകത്തിലെ മഹാബലി ശരിക്കും മഹാബലി ആവണ്ടാ ട്ടാ"

"കുറച്ചു മാന്യമായി സംസാരിച്ചൂടെ കുട്ടപ്പാ?" എന്ന് പറഞ്ഞു തമ്പുരാൻ തിരിഞ്ഞു നടന്നു.

"എന്നെ മാന്യത പഠിപ്പിക്കാൻ നീയാരാടാ" എന്ന് ചോദിച്ചു കഴിഞ്ഞതും..

കട്ടപ്പ ബാഹുബലിയെ പിന്നിൽ നിന്ന് കുത്തിയ പോലെ കുട്ടപ്പൻ മഹാബലിയെ  പിന്നിൽ നിന്ന് ഒറ്റ ചവിട്ട് ..

ധിം തരികിട തോം....  മഹാബലി താഴെ കിടക്കുന്നു.... കണ്ടു നിന്ന ജനങ്ങൾ മുഴുവൻ മൂക്കത്ത് വിരൽ വച്ചു...

----

കുട്ടപ്പൻ മഹാബലിയെ എന്തിനു പിന്നിൽ നിന്നും ചവുട്ടി താഴെയിട്ടു....?

"മാറ്റങ്ങൾ - 2 കണ്‍ക്ലൂഷൻ"  2016 ഓണം റിലീസ്.

2016 ഓണം വരെ കാത്തിരിക്കുക.

കഥ തുടരും...

---------